Bagong taon… Bagong hamon…

     Noong paslit pa lamang ako, tinutulugan ko lang ang pagsapit ng bagong taon pero nitong mga nagdaang taon, buong kasabikan ko itong sinasalubong. Noong paslit pa lamang ako, hinaharap ko ang bawat araw ng may kalakasan subalit ngayon, may takot at agam-agam…

     Panibagong taon na naman ang haharapin ko. Panibagong pagsubok. Minsan, naitanong ko sa sarili ko kung bakit ako nandito sa mundong ito? Nandito ba ako upang subukin buong buhay ko? Sinabi ng matalik kong kaibigan na magbibigay siya ng isangdaang dahilan. Ang dahilan - may gagawin ka pa.

     Isa akong anak, kapatid, kaibigan, pinsan, pamangkin, apo, kinakapatid, kamag-aral, kapitbahay, kaeskwela at kakilala. Marami akong pangarap. Marami pa akong dapat pasalamatan at hingian ng patawad. May responsibilidad ako sa bawat katauhang pinanghahawakan ko. Kailangan ko ng lakas ng loob upang magampanan ang mga obligasyong iyon. Higit sa lahat, kailangang tumibay pa ang aking pananampalataya. Alam ko na SIYA lang ang pag-asa ko. Minsan, nakararamdam ako ng kahinaan ngunit tuwing dumarating ang panahong iyon, binibigyan NIYA ako ng lakas. Alam ko na tapat Siya sa mga pangako Niya. Alam ko na hindi Niya ako iiwan ni pababayaan man. Alam ko na mapagtatagumpayan ko ang mga hamon dahil sa Kanya…